តើលោកចៅសង្កាត់ទើបតែជាប់ឆ្នោតមានសមត្ថភាពដោះស្រាយបញ្ហាដ៏មហាសែនធំនេះបានដែឬទេ?

សាលាសង្កាត់ពងទឹក ខណ្ឌដង្កោ រាជធានីភ្្នំពេញ

  ភូមិស្រែញ៍រ សង្កាត់ពងទឹក ខណ្ឌដង្កោ រាជធានីភ្នំពេញកំពុងជួបបញ្ហាមួយដោះស្រាយមិនចេញទោះបីលោកចៅសង្កាត់ក៏មិនអាចរកដំណោះស្រាយបាន។បន្ទាប់ពី គ ជ ប ប្រកាសលទ្ធផលបោះឆ្នោតក្រុមប្រឹក្សាឃុំ សង្កាត់ជាផ្លូវការព្រមទាំងក្រសួងមហាផ្ទៃប្រកាសសពុលភាពរួចមកសមាជិក្រុមប្រឹក្សាអណត្តិទី៤ទាំង៧នាក់បានចូលបំពេញការងាររៀងខ្លួនៗក្នុងនោះ  លោក ហាក់ គួយ ជាចៅសង្កាត់មកពីគណបក្សប្រជាជនកម្ពុជាជាប់ឆ្នោតចំនួន៤អណត្តិមកហើយ រួមទាំងសមាជិក៣នាក់ទៀតមកពីគណបក្សសង្រ្គោះជាតិក្នុងនោះទទួលបានដំណែងជាចៅសង្កាត់រងទី២ម្នាក់ មានបញ្ហាជាច្រើនចំពោះមុខកំពុងរង់ចាំការដោះស្រាយដូចជា បញ្ហាសន្តិសុខ បញ្ហាទឹកស្អាត បញ្ហាផ្លូវថ្នល់ជាដើម។ជាក់ស្តែងភូមិស្រែញ៍រកំពុងជួបនូវបញ្ហាមួយដោះស្រាយមិនចេញនោះគឺជម្លោះដែលកើតឡើងដោយសារតែបញ្ហាធ្វើផ្លូវស្អាត។

ផ្ទះប្រជាពលរដ្ឋដែលមិនព្រមរុះរើរបងតាមការកំណត់របស់អាជ្ញាធរ

បន្ទាប់ពីសាលាសង្កាត់បានសម្រេចផ្តល់ផ្លូវបេតុងមួយខ្សែប្រវែងប្រមាណ៣០០ម៉ែតព្រមទាំងពង្រីកតួផ្លូវឲ្យធំទូរលាយជាងមុនរួមមក អាជ្ញាធរបានចុះវាស់វែងកំណត់តួផ្លូវហើយតម្រូវឲ្យប្រជាពលរដ្ឋមួយចំនួនរុះរើរបងផ្ទះចេញដើម្បីបើកការដ្ឋានសាងសង់។

ផ្ទះប្រជាពលរដ្ឋដែលបានរុះរើរបងរួចរាល់

ប្រជាពលរដ្ឋមួយចំនួនបានធ្វើការរុះរើរបងផ្ទះរបស់ខ្លួនរួចរាល់តាមការកំណត់របស់អាជ្ញាធរប៉ុន្តែនៅសល់ប្រជាពលរដ្ឋប្រមាណ៦ទៅ៧គ្រួសារមិនព្រមរុះរើរបងផ្ទះរបស់ខ្លួននោះទេដោយបានលើកឡើងថាផ្លូវចាស់ប៉ុន្មានធ្វើតែត្រឹមនឹងទៅមិនបាច់ពង្រីកនោះទេទោះបីជាលោកមេភូមិ សាន់ ឈូ មកសម្របសម្រួលក៏មិនអាចដោះស្រាយបានហើយការដ្ឋានសាងសង់ផ្លូវត្រូវបានផ្អាក។កត្តាបានបង្ករឲ្យមានការខឹងសម្បារជាខ្លាំងពីសំណាក់ប្រជាពលរដ្ឋដែលបានរុះរើរបងផ្ទះរបស់ខ្លួនរួចរាល់រហូតបង្កើតទៅជាជម្លោះយ៉ាងខ្លាំងទោះបីលោកចៅសង្កាត់មកសម្របសម្រួលក៏មិនអាចរកដំណោះស្រាយបានរហូតមកដល់ពេលនេះ។ប្រជាពលរដ្ឋដែលបានធ្វើការរុះរើរបងផ្ទះរបស់ខ្លួនរួចរាល់ទាមទារអាជ្ញាធរសង្កាត់អនុវត្តន៍ឲ្យស្មើភាពគ្នាចំពោះបញ្ហានេះគឺថាបើរុះរើរបងត្រូវរុះរើទាំងអស់គ្នាមិនមែនមានអ្នកខ្លះរុះអ្នកខ្លះមិនរុះនោះទេ។ចំពោះមុខបញ្ហានេះគេសង្កេតឃើញថាទាំងអាជ្ញាធរភូមិទាំងអាជ្ញាធរសង្កាត់ហាក់ដូចជាមានភាពទន់ជ្រាយក្នុងការដោះស្រាយបញ្ហាដ៏សែនធំនេះសូម្បីតែផ្ទះរបស់លោកស្រីសមាជិកក្រុមប្រឹក្សាសង្កាត់ម្នាក់ក៏បានរុះរើរបងផ្ទះរបស់ខ្លួនដើម្បីទុកជាគំរូរហើយក៏ដោយក៏មិនអាចធ្វើឲ្យប្រជាពលរដ្ឋផ្សេងរុះរើបានដែរ។

ផ្ទះប្រជាពលរដ្ឋដែលមិនព្រមរុះរើរបងតាមការកំណត់របស់អាជ្ញាធរ

ផ្ទះប្រជាពលរដ្ឋដែលមិនព្រមរុះរើរបងតាមការកំណត់របស់អាជ្ញាធរ

ផ្ទះប្រជាពលរដ្ឋដែលមិនព្រមរុះរើរបងតាមការកំណត់របស់អាជ្ញាធរ

របងផ្ទះរបស់លោកស្រីសមាជិកក្រុមប្រឹក្សាសង្កាត់ដែលបានរុះរើរួចរា់

សូមគូសបញ្ជាក់ថាផ្ទះប្រជាពលរដ្ឋដែលមិនព្រមរុះរើរបងផ្ទះនោះភាគច្រើនសុទ្ធតែមានរថយន្តបើកចេញចូលហើយសុទ្ធតែមានជីវភាពសមរម្យ។

ជារួមបញ្ហាខាងលើគឺគ្រាន់តែជាបញ្ហាមួយក្នុងចំណោមបញ្ហាដ៏ច្រើនចំពោះដែលកំពុងតែរង់ចាំអាជ្ញាធរសង្កាត់ដោះស្រាយហើយវាព្រាបដូចជាវិញ្ញាសារមួយដើម្បីធ្វើតេស្តសមត្ថភាពក្រុមប្រឹក្សាសង្កាត់ថ្មីផងដែរ៕